گوۋۇيۈەن ئاخبارات ئىشخانىسى 1-سېنتەبىر ئاخبارات ئېلان قىلىش يىغىنى ئېچىپ، دۆلەت شېئىرى ئۆلچەملىك چېلىش نوتىسى ۋە ھۆكۈمەت ئۈنگە ئالغان نۇسخىسىنى ئېلان قىلدى.
بۇ قېتىم ئېلان قىلىنغان دۆلەت شېئىرى ئۆلچەملىك چېلىش نوتىسى ئوركېستىر مۇزىكىسى ئومۇمىي نوتىسى، پۈۋلىمە چالغۇ ئومۇمىي نوتىسى، پىيانىنو تەڭكەش نوتىسى قاتارلىقلارنى ئۆز ئىچىگە ئالىدۇ. دۆلەت شېئىرى ھۆكۈمەت ئۈنگە ئالغان نۇسخىسى ئوركېستىر نۇسخىسى، ئوركېستىر خور نۇسخىسى، پۈۋلىمە چالغۇ نۇسخىسى، پۈۋلىمە چالغۇ خور نۇسخىسىنى ئۆز ئىچىگە ئالىدۇ.
مەملىكەتلىك خەلق قۇرۇلتىيى دائىمىي كومىتېتى قانۇنچىلىق خىزمىتى كومىتېتىنىڭ مۇئاۋىن مۇدىرى ۋۇ زېڭ تونۇشتۇرۇپ مۇنداق دېدى: دۆلەت شېئىرى قانۇنىدىكى ئالاقىدار بەلگىلىمىلەرنى ئەمەلىيلەشتۈرۈش، دۆلەت شېئىرىنى ئورۇنلاش، قويۇش ۋە ئىشلىتىشنى يەنىمۇ قېلىپلاشتۇرۇش ئۈچۈن، مەركىزىي كومىتېت تەشۋىقات بۆلۈمى، گوۋۇيۈەن بەنگۇڭتىڭى، مەملىكەتلىك خەلق قۇرۇلتىيى دائىمىي كومىتېتى قانۇنچىلىق خىزمىتى كومىتېتى ئالاقىدار خىزمەتلەرنى پائال ئىلگىرى سۈرۈپ، جۇڭگو ئەدەبىيات-سەنئەتچىلەر بىرلەشمىسى، جۇڭگو مۇزىكانتلار جەمئىيىتى بىلەن بىرلىكتە دۆلەت شېئىرى ئۆلچەملىك چېلىش نوتىسىنى تەكشۈرۈپ بېكىتىش، دۆلەت شېئىرى ھۆكۈمەت ئۈنگە ئالغان نۇسخىسىنى ئىشلەش خىزمىتىنى قانات يايدۇردى.
ۋۇ زېڭ مۇنداق دېدى: دۆلەت شېئىرىنى ئورۇنلاش، قويۇش ۋە ئىشلىتىشنىڭ چىڭىتىلىشى، قېلىپلىشىشىنى كۈچەيتىش دۆلەتنىڭ ئوبرازى ۋە ئىززەت-ھۆرمىتىنى قوغداشقا پايدىلىق؛ شۇنىڭ بىلەن بىر ۋاقىتتا، خەلق ئاممىسىنىڭ دۆلەت قارىشى، ۋەتەنپەرۋەرلىك ئېڭىنى كۈچەيتىپ، ۋەتەنپەرۋەرلىك يادرو قىلىنغان مىللىي روھنى يەنىمۇ ئەۋج ئالدۇرۇشقىمۇ پايدىلىق.
جۇڭگو ئەدەبىيات-سەنئەتچىلەر بىرلەشمىسىنىڭ مۇئاۋىن رەئىسى، مەركىزىي مۇزىكا شۆيۈەنىنىڭ مۇدىرى، دۆلەت شېئىرى ئۆلچەملىك چېلىش نوتىسىنى تەكشۈرۈپ بېكىتىش مۇتەخەسسىسلەر كومىتېتىنىڭ مۇدىرى يۈ فېڭ تونۇشتۇرۇپ مۇنداق دېدى: بۇ قېتىم تەكشۈرۈپ بېكىتىلگەندىن كېيىن بېكىتىلگەن دۆلەت شېئىرى ئۆلچەملىك چېلىش نوتىسىنىڭ دۆلەت شېئىرى مېلودىيەسىدە ھېچقانداق ئۆزگىرىش بولمىدى، ئاساسلىقى مۇقاۋا، تىتول ۋە نەشرىنى خاتىرىلەش نوتىسى، سۈرئەت بەلگىسى،  ھېسسىيات ئىپادىسى ئاتالغۇلىرى ۋە مۇزىكا نوتىسىنىڭ ئىچكىگە تۈزىتىش كىرگۈزۈشكە ئالاقىدار كۈچلۈكلۈك بەلگىسى قاتارلىق تۆت جەھەتتىن مۇكەممەللەشتۈرۈلدى ۋە قېلىپلاشتۇرۇلدى. دۆلەت شېئىرى ھۆكۈمەت ئۈنگە ئالغان نۇسخىسى «جۇڭخۇا خەلق جۇمھۇرىيىتىنىڭ دۆلەت شېئىرى قانۇنى» نىڭ 10-ماددىسىغا ئاساسەن، ئوخشاش بولمىغان يىللاردا ئۈنگە ئېلىنغان ئوخشاش بولمىغان دۆلەت شېئىرى ئۈن نۇسخىسى ئاساسىدا يېڭىدىن ئۈنگە ئېلىندى.
يۈ فېڭ مۇنداق دېدى: خەلقئارادا ئالدىنقى قاتاردا تۇرىدىغان تېخنىكا بىلەن ئۈنگە ئېلىندى، سۈزۈكلۈكى، جۇشقۇنلىقى، بوشلۇق تۇيغۇسى، نەق مەيدان تۇيغۇسى قاتارلىق نۇرغۇن جەھەتلەردە ئىلگىرىلەش بولدى.
ئۈچ نۇسخىدىكى چېلىش نوتىسى ۋە تۆت ئۈن نۇسخىسى جۇڭگو خەلق قۇرۇلتىيى تورى ۋە جۇڭگو ھۆكۈمەت تورىدا ئېلان قىلىندى.
تەرجىمان: ئادىل ئابلەت
سېلىشتۇرغۇچى: ئەسقەر تۇرسۇن