ئۈرۈمچى شەھىرى 30 نەچچە ئورۇندىكى ئەرزان، قولاي ئۆي مەنبەسىنى ئېلان قىلدى
مەنبەسى:تەڭرىتاغ ئۇيغۇرچە تورى     |تەھرىر:ئوسمانجان يۈسۈپ|     يوللانغان ۋاقىت: 2018-11-08 13:34

ئۈرۈمچى شەھىرى يېقىندا 30 نەچچە ئورۇندىكى كاپالەتلىك تۇرالغۇنى 19-قېتىم كاپالەت خاراكتېرلىك چەك تارتىپ تەقسىملىگەن. ئۇنىڭ ئىچىدە ئاممىۋى ئىجارىلىك ئۆي مەنبەسى ئۈچ ئورۇندا بولۇپ، ئايرىم-ئايرىم ھالدا باداۋان بۆلەك رايونىدىكى چۈنخېيىيۈەن، شەنشۈييايۈەن ۋە مىچۈەن-دۇڭسەن رايونىدىكى چۈنخې لۇڭشېڭيۈەن ئولتۇراق رايونى ئىكەن؛ ئەرزان، قولايلىق ئۆي مەنبەسى 30نەچچە ئورۇندا بولۇپ، ئاساسلىقى تاۋار ئۆي ئولتۇراق رايونىدىن سەپلەنگەن.

بۇ قېتىم ئېلان قىلىنغان ئۆي مەنبەسىدىكى ئۆيلەرنىڭ كۆلىمى 31 كىۋادرات مېتىردىن 87 كىۋادرات مېتىرغىچە بولۇپ، ھەربىر كىۋادرات مېتىر ئۆينىڭ ئوتتۇرىچە باھاسى 2110 يۈەندىن 3500 يۈەنگىچە بولىدىكەن.

نۆۋەتتە، ئاممىۋى ئىجارىلىك ئۆينىڭ كاپالەت دائىرىسى داۋاملىق تۆۋەن تۇرمۇش كاپالىتىدىن بەھرىمەن بولۇۋاتقان ئائىلىلەر، تۆۋەن كىرىملىك ئائىلىلەر، ئوتتۇرا كىرىملىكتىن سەل تۆۋەن ئائىلىلەر، سىرتتىن كەلگەن ئىشلەمچىلەر ۋە يېڭىدىن ئىشقا ئورۇنلاشقان خىزمەتچىلەر بولۇپ، يېزا ئىگىلىك يۆتكەلمە ئاھالىسى، ياش دوختۇرلار ۋە ياش ئوقۇتقۇچىلار قوشۇلۇپ، كاپالەت دائىرىسى سەككىز خىل كىشىلەرگە كېڭەيگەن، بۇلار ئىچىدىكى ئايلىق كىرىمى 3085 يۈەندىن تۆۋەن، ھەمدە كىشى بېشى ئولتۇراق كۆلىمى 13 كىۋادرات مېتىردىن تۆۋەن كىشىلەر ئەرزان ئىجارىلىك ئۆيگە ئىلتىماس قىلسا بولىدىكەن.

ھازىرغىچە، مەركىزىي شەھەر ئۈرۈمچىدە جەمئىي 11 مىڭ 209 ئائىلىلىككە كاپالەت خاراكتېرلىك ئۆي تەقسىملەنگەن.